10:27:11 am 12-Dec-2019

क्यान महासंघमा कुवँर समुहको उम्मेदवारी घोषणा


क्यान महासंघमा कुवँर समुहको उम्मेदवारी घोषणा

काठमाडौं-सूचना प्रविधि व्यवसायी नवराज कुँवरले कम्प्युटर एशोसिएशन नेपाल (क्यान) महासंघको अध्यक्ष पदमा उम्मेदवारी दिने घोषणा गरेका छन् ।
क्यानको वरिष्ठ उपाध्यक्ष रहेका उनले संस्थाको २६ वर्षे इतिहासमा उपत्यकाबाहिरबाट पहिलो पटक नेतृत्वमा दाबेदारी पेश गरेकाहुन् । आगामी मंसिर ७ गते क्यान महासंघको १३औं कार्य समितिको निर्वाचन हुँदैछ ।
“मुलुकका ७७ ओटै जिल्लामा क्यान महासंघका शाखा पु¥याई मुलुकमा सूचना प्रविधिको विकासलाई नयाँ चरणमा प्रवेश गराउने सोचका साथ मैले सूचना प्रविधि व्यवसायीको छाता संस्थाको रुपमा रहेको क्यान महासंघको अध्यक्ष पदमा दावेदारी पेश गरेको हुँ,” कुँवरले भने ।
सूचना प्रविधि सम्बन्धि सामान एवं सेवा आयात र निर्यातमा देखिएको समस्या तथा ब्रोडव्याण्ड कनेक्टिभिटि सञ्चालनमा रहेको अव्यावाहारिक कर नीतिलाई सरकारसँग छलफल गरि समाधान गर्न पहल गरिने कुँवरको भनाई छ ।
आफू निर्वाचित भए केन्द्र र सातै प्रदेशमा क्यान फेडेरेशनको आफ्नै भवन तथा पूर्वाधार तयार गर्ने र प्रादेशिक सचिवालय स्थापना गर्ने कार्यलाई प्राथमिकता दिने कुँवरले बताए । नेपालको सबैभन्दा ठूलो सूचना प्रविधि मेला क्यान इन्फोटेकलाई अझ परिष्कृत र विकसित बनाउँदै यसलाई सातै प्रदेशमा विस्तार गर्ने योजना पनि उनले अघि सारेका छन् ।
त्यसैगरी, ‘नेपाल भ्रमण वर्ष २०२० लाई सफल बनाउन सूचना प्रविधि (आईटी) र पर्यटन प्रविधि (टीटी)लाई सम्बोधन गर्ने गरी गण्डकी प्रदेशको राजधानी पोखरामा अन्तरराष्ट्रिय सम्मेलन आयोजना गर्नेछौं,’ उनले भने । सूचना प्रविधिका विभिन्न क्षेत्रको विकासका लागि अन्तरराष्ट्रिय सहयोग जुटाउन आफूले पहल गर्ने र सूचना प्रविधिको हस्तान्तरण गरी मुलुकको विकासमा टेवा पु¥याउनका लागि नेपालमा भएका कुटनीतिक नियोगसँग छलफल गरी काम अगाडि बढाउन पहल गर्ने पनि उनले बताए ।
कुँवरका अनुसार गैरआवासीय नेपालीमार्फत सूचना प्रविधिका कम्पनीमा विदेशी लगानी भित्राउन आवश्यक कदम चालिनेछ । विदेशिएको युवा जनशक्तिलाई सूचना प्रविधिको क्षेत्रमा स्वदेशमै रोजगारी सृजना हुने वातावरणको खोजि गरिने छ ।
। ‘हामीले नेपाली उद्यमी व्यवसायी तथा सफ्टवेयर कम्पनीलाई सूचना प्रविधिसम्बन्धी अन्तरराष्ट्रिय मेला तथा प्रदर्शनीमा सहभागिता तथा अवलोकनका लागि सहयोग गर्ने योजना पनि बनाएका छौं,’ उनले भने ।
विसं. २०५२ देखि क्यानको सदस्य रहेका कुँवरले २०५७ सालमा लुम्बिनी अञ्चलका सूचना प्रविधि व्यवसायीलाई संगठित गरी आफ्नो अध्यक्षतामा क्यान लुम्बिनी संस्था गठन गरी क्यानको पहिलो शाखाको रुपमा सदस्यता दिलाएका थिए । विगत डेढ दशकदेखि क्यानको केन्द्रीय समितिमा रहेर कामको अनुभव संगालेको, समितिका सबैभन्दा पूरानो र हाल बरिष्ठ उपाध्यक्ष भएकोले पनि आफ्नो उम्मेदबारी स्वाभाविक रहेको कुँवरले बताएका छन् ।
सातै प्रदेशमा विस्तार भएको महासंघले हालसम्म ५७ जिल्लामा उपस्थिति जनाइसकेको छ भने करीब ५ हजार सदस्यहरु यसमा आवद्ध छन् । मुलुकले संघीय संरचना अनुसरण गरे अनुरुपक्यान फेडेरेशनले पनि आफूलाई त्यही स्वरुपमा ढाल्दै लगेको छ । राष्ट्रिय सूचना प्रविधि नीति तथा कार्यक्रममा सरकारलाई परामर्श दिने तथा सहकार्य गर्ने, मुलुकमा यस क्षेत्रका लागि व्यावसायिक वातावरण निर्माणका लागि प्रयासरत रहने, व्यवसायीको हकहीतका लागि निरन्तर काम गर्ने तथा अन्तरराष्ट्रिय क्षेत्रमा सहकार्य गर्ने जस्ता कार्यमार्फत क्यानले आफूलाई यस क्षेत्रको सशक्त संस्थाको रुपमा उभ्याउन सफल भएको छ । क्यानलाई त्यसै दिशामा अझ प्रभावकारी ढंगले अगाडि बढाउने आफ्नो योजना रहेको पनि कुँवरले बताए । कुँवर आफ्नो समुहबाट संस्थागत साधारण समुहबाट राजन कर्माचार्य, अमित सराफ, राजेश अग्रवाल, शंकर श्रेष्ठ, शर्मिला भुजेल, निरञ्जन पटेल, सुरेन्द्र न्यौपाने, संस्थागत आजिवन समुहबाट, नविन जोशी, राजेन्द्र अर्याल, व्यक्तिगत आजिवन समुहबाट प्रा. डा. शुवर्ण शाक्य, विक्रम श्रेष्ठ, दामोदर अधिकारी व्यक्तिगत साधारण समुहबाट खुसल रेग्मी, रत्नतारा बैद्य, सुवास खड्का, घनश्याम खनाल, श्रवण श्रेष्ठ, श्री पौडेल, दिनेशराज कार्की. वस्तुगत सदस्य समुहबाट नारायणबहादुर थापा, भोजराज भट्ट, चिरञ्जिवी अधिकारी, प्रताप सापकोटा लेखा समितिमा लक्ष्मण यादव (संस्थागत सदस्य समूह), भिमसेन गिरी (जिल्ला शाखा) जिल्ला शाखा समुहबाट प्रदेश नं २ः दिपेन्द्रराज सिंह र भुपालदास श्रेष्ठ प्रदेश नं ३ः शेखरनाथ दुलाल र भानु शर्मा गण्डकी प्रदेशबाट अशोकबाबु राना प्रदेश नं ५ रेशम गिरी र ध्रुवराज शर्मा (सुदिप) कर्णाली प्रदेशबाट दलबहादुर खड्का र भिम मल्ल, सुदुर पश्चिम प्रदेशबाट हर्क सेठ्ठी र खेमराज ढुंगाना उम्मेदवार रहेको घोषणा गरे ।

Ad

सम्बन्धित समाचारहरु​



CONNECT WITH US













IS A SITE DESIGNED MOSTLY FOR YOUNG GENERATION

BANESHWOR, KATHMANDU

PHONE NO: 9841282100

[email protected]